【#清熱潤喉】金羅漢果蘋果茶

🎄聖誕節期間食咗唔少熱氣嘢🍗🍕🍟，3日內仲兩次BBQ，熱氣指數即時level up，即見喉嚨痛🤷🏼‍♀！
今日就嗱嗱聲煲個金羅漢果茶🍵俾兩位主子，下火清熱，潤下喉嚨。我仲加埋蘋果🍎、紫花果同椰片，更滋潤！ (><懷孕中嘅媽我就有得煲無得飲)

金羅漢果味道清甜，無普通嘅羅漢果嘅苦澀，更易入口😊，而所含嘅維生素仲比普通羅漢果多30倍！
另外，⭐羅漢果偏涼，所以加入咗陳皮中和。

金羅漢果: 清熱潤肺、止咳化痰、咽喉腫痛
蘋果: 生津潤肺
紫花果: 含花青素，有抗氧化同保眼功效，清熱滋潤
椰片: 滋陰潤肺

材料:
1. 金羅漢果 1個 (用普通羅漢果都得)
2. 蘋果 2個
3. 紫花果 3-4粒 (用黃色嘅無花果都得)
4. 椰片 1把
5. 陳皮 1小瓣
6. 水 2L

做法:
1) 陳皮以清水浸軟刮囊。
2) 蘋果刮去皮上的蠟，洗淨，去芯切件。
3) 紫花果然椰片浸洗淨。
4) 紫花果剪開一半。(剪開才出味)
5) 羅漢果洗淨，用手握碎。
6) 煲內注入水，加入所有材料，大火滾5分鐘，轉小火煲1小時，熄火焗15分鐘，然後隔走羅漢果，完成。

notes:
1) 材料有藥材成份，要了解自己個人體質是否適合飲用。
2) 脾胃虛寒、寒咳不宜飲用。
3) 蘋果連皮煲有一定功效。
4) 蘋果需去芯，否則會酸苦。

好耐無分享涼水
#懷孕期間好多涼水都唔飲得
#有得煲無得飲
#媽媽廚樂
 #小b媽媽食譜
#家常涼水 #小b4歲半
#二寶21週🤰🏼

【親子共食】台式肉鬆蛋餅 12m+

每次去台灣，必定會去到某老店吃台式蛋餅做早餐。非常懷念！心郁郁決定自己在家動手做！簡單易做，唔洗15分鐘就有得食。做早餐、下午茶、宵夜都得！
餡料自由配搭，可以加芝士、火腿、蔬菜、煙肉、紫菜等....今次媽媽就用上魚鬆，可跟小b親子共食。

材料:
1. 中筋麵粉 40g
2. 粟粉/鷹粟粉 約半湯匙
2. 熱水 100ml
3. 蛋 1隻
4. 蔥花 適量
5. 肉鬆/魚鬆 適量

做法:
1. 中筋麵粉加入粟粉，然後倒入熱水，拌勻至無粉粒，再加入蔥花拌勻。
2. 中小火燒熱煎Pan，倒入油，下麵糊，將麵糊平均鋪滿於煎Pan底，把餅皮煎至接近熟透。
3. 加入雞蛋，弄穿蛋黃，將蛋推開至覆蓋餅皮。
4. 平均放上魚鬆，捲起蛋餅成長條形，煎至兩面金黃及熟透。
6. 將蛋餅切開，便可享用。

我的二寶孕初期 (0-3個月)

有人話陀第二胎辛苦過第一胎！ 

我就深深體會到！ 🤰🏼喺懷孕初期頭3個月，害喜嘅情況都挺嚴重同辛苦😢 ！

冇胃口、食唔落、胃酸倒流、作嘔、孕吐樣樣有齊！跟陀小b嗰時係兩回事！當時陀小b，整個孕期裡都只係嘔過兩次，今胎未夠3個月就嘔過好多次😫！小b爸都好擔心，仲話: 「今胎嘔咗咁多次，上胎陀阿仔都冇咁辛苦！」 

唔止咁，因為血壓低，經常見暈，唔舒服，好多家頭細務都做唔到🤦🏼‍♀。試過暈陀陀暈足兩日，全日都要瞓喺度。照顧小b，家務等，都交哂俾小b爸，連3餐都係靠佢買外賣返嚟！

 不過，最辛苦嘅係肚痛！感覺啲腸胃迫埋哂一齊，拿住拿住痛！仲痛到嘔出嚟！😔而最嚴重嗰刻喺地鐵，沾寒沾凍，標哂冷汗💦，上扶手電梯突然眼前黑咗一刻，幸好冇暈低！

🙏🏻 以上嘅狀況，一過咗3個月就好好多了💜！只係間中仲有作嘔及胃酸倒流嘅情況！  

到了踏入懷孕嘅第4個月，☎就收到通知中咗 #妊娠糖尿 ，往後嘅日子就要keep住督手指督到生！同時要控制好食量、少食多餐、戒口、每餐用油都要注意用一茶匙、食飽飯要散步30分鐘🚶🏼‍♀。 

【簡單派對小食】芝士腸仔酥

好快就到🎅聖誕節喇！
介紹個簡單派對小食俾大家 ^^
作野餐或生日會小食都得!

又簡單又快，酥皮卷住腸仔，再掃上蛋液， 拎去氣炸/焗就完成！

材料:
1. 芝士腸 9條
2. 現成酥皮 1塊
3. 蛋液 適量

做法:
1) 將現成酥皮切成9份。

2) 把芝士腸放在現成酥皮上，卷起，掃上蛋液，然後放入氣炸鍋，180度18分鐘，完成。
(如用焗爐，先預熱200度，焗15分鐘)

▼我家用緊美的嘅健炸鍋 (型號: Midea MF20B免油健炸寶 ) 

#Midea健炸鍋 #MF20B #30個月保養 #mideahk

營養豐富【蕃茄南瓜三文魚湯】

呢兩日凍咗好多！得12、13度！
而天氣一凍，就特別想飲碗暖笠笠、味道又濃郁嘅湯！
南瓜湯就啱哂，飲落感覺好似特別溫暖啲。

大人小朋友都鐘意飲，營養又豐富！
小b大讚好味，豎起兩隻手指公，話俾兩個GOOD我！

南瓜: 豐富維生素及胡蘿蔔素，助小朋友生長發育上維持正常。
三文魚頭: 營養價值高，含豐富蛋白質及 Omega-3 脂肪酸，大人小朋友都有益。
孕媽媽吸取足夠嘅Omega-3，有助寶寶發展神經及視力。

材料:
1. 南瓜 1個 (2斤)
2. 蕃茄 4-5個 (視乎大小)
3. 洋蔥 1個
4. 三文魚頭+魚骨 1Pack
5. 薑 數片
6. 水 2L
7. 熱水 800ml
8. 魚袋 1個

做法:
1) 南瓜去皮去囊，切件備用。
2) 蕃茄洗淨，切開6-8件，備用。
3) 洋蔥去皮，切件。
4) 湯煲內注入2L水，放入蕃茄、南瓜、洋蔥，大火去煲。
5) 喺煲緊蕃茄南瓜洋蔥湯時，另一邊廂，燒熱鑊，下少許油，爆香薑片，下三文魚頭+魚骨煎香後，將三文魚頭+魚骨放入魚袋，然後放回鑊，轉大火倒入800ml熱水，加上蓋，滾10-15分鐘，呈奶白色魚湯，之後倒入湯煲內與蕃茄、南瓜、洋蔥以細火煲1.5小時，最後可加少許鹽調味，便可享用。