[媽媽廚樂] 日式生薑豚角煮

勁好味！唔難做！
炆45分鐘，啲肉又腍又入味，蘿蔔索哂汁！
隔日食仲正仲腍呀！！

送飯，送麵，夾刈包都好得！

材料:
1. 腩肉 2pack (我係數字屋買)
2. 日本大根 半個
3. 薑片 5-6片

汁料:
1. 醬油 3大湯匙
2. 味醂 3大湯匙
3. 清酒 2大湯匙
4. 糖 適量 (我用了一小舊冰糖)
5. 水 約400ml

做法:
1) 將腩肉洗淨， 切件，下少許薑茸及醬油拌勻，醃30分鐘以上。
2) 日本大根滾刀切件。
3) 將已醃好的腩肉煎至兩面金黃，盛起備用。
4) 預熱油鑊，下薑片爆香，再加入大根及腩肉，下汁料拌勻煮滾，轉慢火炆45分鐘 (期間不時攪拌免痴底)，完成。