【媽媽廚樂】自家製咖喱魚蛋

雖然朝早去超市，排咗兩個鐘隊買漂白水、廁紙等，個人已經好攰！不過為食嘅 #孕媽媽 ，敵唔過美食！
前幾日見朋友分享 #咖喱魚蛋，已經好想食！
但呢個時勢同大緊肚，唔可以亂食街邊嘢！
所以自己整！
勁正，夠哂辣！
拮咗粒俾小b爸試。
佢問: 好味啊! 喺邊度買番黎架？幾錢串？

材料:
1. 陳皮魚蛋 1磅
2. 蒜頭 半個 (剁蓉)
3. 乾蔥 3-4粒 (剁蓉)

4. 咖喱雞醬 1包 (超市有售)

5. 桂林辣椒醬 1茶匙
6. 海鮮醬 2湯匙 (唔落都得)
7. 蠔油 少許
8. 水 400-500ml
9. 糖 少許
10. 鹽 少許

做法:
1. 魚蛋洗淨汆水去油。
2. 預熱鑊，下油，爆香蒜蓉和乾蔥蓉，加入魚蛋炒勻，倒入咖喱雞醬、桂林辣椒醬、海鮮醬、蠔油炒勻，然後倒入水拌勻煮滾，加入糖同鹽調味，然後蓋上鑊蓋煮至咖喱汁杰身，完成。