《#派對小食 / #茶點 / #親子共食 : 草莓千層酥》

 仲有幾日就到聖誕，等媽媽再介紹多一款聖誕派對小食俾大家！

#草莓千層酥 賣相係咪好吸引呢？仲酥脆可口，大家更可以配搭自己喜歡嘅水果添！

材料:
1. 酥皮 3塊
2. 吉士粉 適量
3. 奶 適量
4. 蛋黃 2顆
5. 糖粉 適量 (裝飾用，唔落都得)

做法:
1) 預熱焗爐，180 度。
2) 吉士粉加入適量奶，拌勻至自己喜歡嘅杰度，然後放入唧袋，備用。
3) 酥皮解凍後，平均分成9小塊。取兩小塊酥皮，疊起，用圓形模切出圓形，然後底放一塊完整小酥皮，用叉在底部拮數下，於表面掃上蛋黃液，放入焗爐180度焗18分鐘至金黃色。之後取出待涼後，中間加上吉士醬，放上草莓，撒上糖粉便完成。

notes:-
1) 每個焗爐爐溫有差別，請自行調節溫度及時間。

#Christmas #聖誕節
#小B食譜 #小B飲食 #食譜 #菜點
#寶副食 #寶寶食譜 #兒童食譜
#二寶媽
#小b媽媽廚樂
#媽媽廚樂
#小b6y
#妹豬18m

《家常菜》肉碎蒸蛋

蒸蛋滑嘟嘟，配埋肉碎，#超好送飯！

材料:

1. 免治豬肉 適量
2. 雞蛋 3顆
3. 雞湯 250ml
4. 蔥粒 少許

做法:
1. 雞蛋打勻，加入雞湯拌勻，過篩，包上微波爐保鮮紙，中火隔水蒸8-10分鐘，焗5-10分鐘。
2. 另一邊廂，預熱油鑊，加入免治豬肉碎炒至轉色， 加入蒜蓉炒勻，再加入適量蠔油、生抽、老抽、糖、水，炒勻， 然後加入生粉水，煮至濃稠，熄火，放在蒸蛋上，最後灑上蔥花，完成。

【媽媽廚樂】肥牛湯烏冬

小b爸🧑🏻: e...個烏冬咁爽口彈牙嘅？正喎！

食咗半碗烏冬嘅小b👦🏻搶住問: 媽咪，仲有無烏冬？我想食多碗呀！

我哋一家都好鐘意食烏冬！以前同小b爸拍拖經常走去食烏冬！
話樣嘢俾你知，其實小b有個花名叫做 "烏冬" (媽媽谷好友一定知)！
而媽媽我，就對烏冬都有少少講究，鐘意口感較煙韌嘅，最怕煮兩煮就斷兼淋。
元朗腐竹 @hkbeancurd 以石磨製成嘅讚岐烏冬，將小麥麵粉同海鹽混合，口感煙靭彈牙、爽滑，食過就知正！再睇埋兩父子嘅反應，就知無得頂啦！

我哋就偏愛熱湯食法，呢個  #肥牛湯烏冬 簡單又好味，一家食到Lam Lam 脷！

材料 (3人份)：
1. 石磨讚岐烏冬 3個
2. 肥牛 半磅多啲
3. 洋蔥 1/2個 (切條)
4. 蔥花 適量
* 按自己喜歡加入丸類或者青菜等*

調味料:
1. 鰹魚汁 1湯匙
2. 醬油 1湯匙
3. 味醂 1湯匙
4. 水 少許
5. 糖 少許

湯料:
1. 鰹魚汁 2.5湯匙
2. 醬油 1湯匙
3. 味醂 1湯匙
4. 水 約800ml
5. 糖 少許
6. 鹽 少許

做法:
1) 湯料、調味料分別拌勻，備用。
2) 預熱炒鍋，加少許油，爆香洋蔥後加入肥牛炒散，下調味料炒勻，煮至收汁，備用。
3) 湯煲內加入湯料煮滾，然後加入烏冬，按烏冬包裝袋上嘅烹煮時間去煮熟，盛起，再放上洋蔥肥牛。灑上蔥花，便可享用。

消暑清熱 × 媽媽廚樂《蘋果竹蔗青檸茶》

酸酸甜甜，好清甜，雪凍仲好飲！

雖然秋季已開始，不過天氣仲係好熱！
湊完兩個出完街番嚟，飲番杯，解渴消暑！好過飲汽水😬！

🍎蘋果-生津潤肺
🎋竹蔗: 味甘清熱
🟢青檸: 潤喉

材料:
1. 蘋果 3個
2. 竹蔗 2枝 (一枝大概有前手臂連手掌咁)
3. 青檸 2個
4. 水 2L

做法:
1) 竹蔗中間劈開成兩份。

2) 蘋果用小刀刮去皮面的蠟，然後去芯，切件。
3) 煲內注入水，除青檸外，將竹蔗及蘋果放入，大滾15分鐘，轉小火煲1.5小時 (可加入冰糖作調味)，待涼後，便可加入青檸汁，便可享用。

▼兩個細飲無雪凍，室溫嘅。

notes:
飲用之前，要了解自己的體質是否適合飲用，以及先諮詢中醫師之意見。

#家常餸菜 #家常菜式 #家常湯水
#二寶媽 
#小b媽媽廚樂
#小b6y
#妹妹15m

[幼兒食譜] 萬用蕃茄肉醬 | 寶寶紅醬

#蕃茄肉醬 配飯、配意粉、配肉丸抑或配薯蓉都得！ 

萬用百搭又好味！

兩兄妹都好鐘意食！務必清哂！
特別係小b，經常都叫我整俾佢食！ 

之前分享過 #紅醬 做法，
今次就有改咗少少，同樣簡單煮！

《🍅萬用番茄肉醬🍅》

材料:  (兩兄妹份量)
1. 番茄 2個
2. 蒜頭 1瓣 (剁碎)
3. 免治牛肉 約120g
4. 洋蔥 2片 (切碎)
5. 糖 少許 (一歲前的baby，請省略)
6. 芝士碎 適量

做法:
1. 番茄洗淨，底部介十字，烚1分鐘左右，盛起去皮，切碎，備用。
2. 預熱易潔鍋，爆香洋蔥碎並加入免治牛肉及蒜蓉炒熟，再加入番茄及糖炒勻，煮滾，蓋上鍋蓋細火煮至軟腍出水，最後加入芝士碎拌勻到溶化，完成。

notes:
1) 留意番有否對食材敏感。

《嬰幼兒食譜》南瓜米餅 12m+

 初試自製米餅^^

你哋嘅小朋友係咪好鐘意食米餅？我哋妹豬就非常鐘意！一見到就雙眼發光，即時放底手上嘅嘢，攞咗米餅食先！仲要食淨少少，揸住喺手仔，留番嚟慢慢啜下啜下，唔捨得食哂 (haha...)
見佢咁鐘意食米餅，上網搵下參下考啲做法，自己整俾妹豬，無添加，bb食得開心，媽媽更安心！

材料:-
1. 南瓜 約50g
2. 蛋白 1只
3. 白飯 70g
4. 配方奶 60ml

做法:
1) 南瓜蒸熟，與配方奶及白飯放入攪拌機內攪拌勻，然後過篩。
2) 預熱焗爐100°。
2) 蛋白做電動打蛋器打至企身 (有小勾)。
3) 南瓜糊加入1/3蛋白輕手拌勻，再倒入餘下的蛋白輕手拌勻，裝入唧袋，平均唧在鋪了牛油紙的焗盤上，放入焗爐110°，焗60分鐘，反轉110°，焗5-10分鐘，完成。

notes:
1) 每個焗爐爐溫有差別，請自行調節溫度及時間。
2) 留意番有否對食材敏感。

[嬰幼兒食譜] 清碟不敗之最 -- 白汁蔬菜燴飯

由小b哥哥baby時，每次煮白汁，都必定清碟😋。

而家到妹豬都唔例外！今日再encore添😆😆！

唔難做，❌無調味，❌連油都無落，只係用🐟三文魚煎出嚟嘅魚油，炒香蔬菜粒，加配方奶加飯，飯吸收取哂啲奶奶就攪掂！就係咁簡單😊！ 

材料： 

1. 洋蔥 2片 

2. 粟米 適量 

3. 紅蘿蔔 適量 (切丁) 

 4. 菜心 適量 (切碎) 

5. 配方奶 100ml 

6. 三文魚柳 1件 (約半隻掌心) 

7. 飯仔 寶寶一餐份量 

做法： 

1) 燒熱易潔鑊，下三文魚煎出魚油，然後加入洋蔥、 粟米及紅蘿蔔粒，炒熟，並將三文魚壓碎。倒入奶拌勻，再加入飯同菜拌勻，蓋上蓋，煮幾分鐘， 飯吸收哂啲奶奶，收哂汁，就完成。 

 notes:- 

1) 蔬菜可用上蘑菇、西蘭花等等自己喜歡嘅蔬菜。

 2) 三文魚可以改成肉碎或雞肉粒等。

 3) 一歲前需用配方奶。 

4) 較大的小朋友可用牛奶或無糖豆漿。 

5) 留意番有否對食材敏感。 

#小B食譜 #小B飲食 #食譜 #妹豬食譜 #寶副食 #寶寶食譜 #兒童食譜 #二寶媽 #小b媽媽廚樂 #媽媽廚樂 #小b5y10m #妹妹11m #鄭小b之成長日誌 

更多資訊/食譜，可瀏覽我哋Facebook:

https://www.facebook.com/MyBabyAustin

Instagram: https://www.instagram.com/babyaustin06/
MeWe: https://mewe.com/p/鄭小b之成長日誌

[嬰幼兒食譜] 寶寶紅醬配薯蓉通粉

上次做過白汁，妹豬非常喜歡😍！

今次就做咗紅醬俾佢試下！

❌無調味料，只用上蕃茄🍅同免治豬/牛肉！而媽媽我擔心🤔蕃茄會太酸，所以另外加咗小小南瓜蓉。
仲可以整多少少，❄雪起做冰粒，聽日或後日翻熱煮其他嘢都得。

材料:
1. 番茄 1個
2. 南瓜 1小塊
3. 免治豬/牛肉 適量
4. 澳洲薯仔 1個
5. 羽衣甘藍 1塊 (可省略)
6. @Bruno Choice 蝴蝶粉 適量 (可用其他意粉)

做法:
1. 番茄洗淨，底部介十字，烚1分鐘左右，盛起去皮，切碎，備用。
2. 薯仔及南瓜去皮切件，蒸熟，分別壓成蓉，備用。

喺蒸嘅同時，另一邊廂，將蝴蝶粉煮熟，及將羽衣甘藍灼熟剪碎。
3. 預熱易潔鍋，中火加入肉碎炒熟，再加入番茄煮至軟腍出水，然後加入南瓜蓉及少少水，轉小火滾起，熄火，盛起備用。

4. 將羽衣甘藍與薯蓉拌勻。
5. 器皿來加入蝴蝶粉， 然後鋪上薯蓉，倒入紅醬，完成。

喜歡的話，亦可好似我哋咁， 灑上少許芝士碎，放入焗爐，焗至芝士溶化，即可。

notes:-
1. 做一大碗寶寶紅醬，一餐用唔哂，可雪起做冰粒。翻熱後加入芝士拌勻，便成芝士紅醬。
2. 選取一些較紅的蕃茄，美味一點，沒那麼酸。
3. 喜歡的話可以加入洋蔥丁，蘿蔔丁等去煮寶寶紅醬。

更多資訊/食譜，可瀏覽我哋Facebook:

https://www.facebook.com/MyBabyAustin

Instagram: https://www.instagram.com/babyaustin06/
MeWe: https://mewe.com/p/鄭小b之成長日誌

[親子好去處] 日清《合味道紀念館香港》| 全球獨家榖物麥片工作坊 × 創作個人專屬杯麵 |

自己杯麵自己DIY‼️親自創作個人專屬杯麵‼️

有得食又有得玩^^

位於尖沙咀中港城嘅 #合味道紀念館 正式開幕喇！剛剛過去嘅星期六，我哋就嚟到率先體驗，親自創作獨一無二嘅食品！

紀念館佔地足足有成1萬平方呎，以「安藤百福創造力之旅」為主題，設有3大打卡位同體驗式工作坊。由紀念館首席創意總監---清仔，帶大家導覽館內創新元素同食品製作過程。 

入場前均須先量度體溫，同填寫資料作登記。而進入一個工作坊都必須消毒雙手，並需保持社交距離。館內每日都會清潔及消毒，每節工作坊完結後亦會消毒，確保衛生。

《3大體驗式工作坊》包括:-

「出前一丁工作坊」

大家都應該好熟識！可以親自DIY出前一丁包裝，「瞬間熱油乾燥法」速炸乾以至包裝，完成一個屬於自己嘅出前一丁，仲可以了解到有關出前一丁嘅小知識添！

首先清潔消毒雙手，就戴上印有出前一丁嘅頭巾同穿好圍裙後，聽工作人員講解之後，就動手碌麵糰！

然後將麵糰放入壓麵機， 攪動壓麵機將麵糰壓平，再對摺麵糰放入壓麵機。呢個動作要重複14次架！的確要花啲氣力，不過過程好好玩！之後麵糰就拎去切成麵條，然後蒸完再速炸！

 

呢個時候，我哋就去設計公仔麵包裝袋，畫上圖案，然後就可以攞去包裝！

個人專屬出前一丁就誕生喇！Yeah~ 

頭巾仲可帶走架！可以用嚟包住自己個出前一丁，好似個便當咁拎住！

**留意番！「出前一丁工作坊」於4月中先才供大眾參加。** 

「榖物麥片工作坊」

係全球獨家架！

以投射互動，由清仔介紹新產品榖物麥片誕生嘅緣由同製作過程。之後仲會有互動遊戲添，加深大家對產品嘅了解！

然後我哋就開始設計榖物麥片杯圖案同選擇自己口味同配料！

我同小b都好鐘意楓糖，二話不說，選了楓糖漿口味！

跟住就交俾工作人員幫忙加入材料同蓋上杯蓋包裝好。

最後，我哋就裝充氣袋泵脹，就大功告成喇！

提提大家，唔好泵咁脹呀！唔係就會好似我哋咁，攪到個榖物麥片杯扁咗=_=" 

「我的合味道工作坊」

同樣強勢回歸！

同樣可以親手設計杯麵包裝同自己配搭材料，DIY出屬於自己嘅合味道杯麵。 

畫上自己喜歡嘅圖案喺杯麵杯上。

揀選自己喜歡嘅杯麵口味同材料。

跟住就交俾工作人員幫忙加入材料同蓋上杯蓋包裝好，就完成喇！

紀念館內經典展覽特備3大打卡位:-

最吸睛必定係「杯麵牆」，展示出各地唔同口味及包裝嘅合味道杯麵！

仲有巨型「大杯麵」，有成3米高架！重現創辦人研發此家傳戶曉嘅食品時所運用嘅創意及逆向思維。

另外，仲有特色展牆介紹創辦人三大發明—即食麵、合味道杯麵同「太空拉麵」(Space Ram) 及背後嘅趣聞，同時可認識到日清食品多年來嘅發展里程碑。 

另外，館內仲設有紀念品店，入面展出多珍藏精品。同時亦有一系列獨家精品俾大家選購。

**紀念品店係免費入場架！**

多款獨家精品俾大家選購！

日清「合味道紀念館」
地點: 尖沙咀中港城2樓26至35號
開放時間: 
逢星期一、二、四、日：上午11時15分至下午8時15分
逢星期五、六及公眾假期：上午11時15分至下午9時15分
逢星期三：休館
票務詳情: 
工作坊門票於 www.cupnoodles-museum.com.hk 網上發售。
門票收費:
入場收費/人 (成人及小童同價)
我的合味道工作坊: HK$60 (30 分鐘)
出前一丁工作坊 : HK$120 (90 分鐘)
穀物麥片工作坊 : HK$60 (30 分鐘)
*紀念品店免費入場。 

限制提示: 
1. 我的合味道工作坊
- 3歲以下並不會佔用任何座位幼童。可在成人陪同下免費入場 (成人人數必須跟小童人數相等)
2. 出前一丁工作坊
- 參加者最低身高要求為110cm。
- 活動分組進行，參加此工作坊的訪客必需購買雙數數量的門票。
3. 穀物麥片工作坊
- 需年滿3歲或以上之小童參與。
4. 所有參加者必須準時參與工作坊，逾時不候。